العلاقات المفتوحة - Open Relationships

Iالبوست دة عن العلاقات المفتوحة .. فيه ناس كتير (اغلب الناس) مش بتحب النوع دة من العلاقات و بتعتبره نوع من الخيانة المتفق عليها و انها مش علاقة اصلاً .. إلخ إلخ .. دي فرصة كويسة للي بيفكر كدة انه ياخد فكرة اوسع عن العلاقات المفتوحة و يفهمها بشكل احسن.

ايه هيا العلاقات المفتوحة؟ هي نوع من العلاقات اللي فيها الطرفين بيتفقوا انهم ممكن يعملوا سكس مع ناس تانيين سواء هما الاتنين مع بعض (ثريسم او جروب) او كل واحد لوحده يقابل اللي هوا عايزه .. دة التعريف كدة مبدئياً .. فيه علاقات مفتوحة بتكون مشروطة .. مثلاً .. ان ماينفعش حد يعمل سكس مع حد من برا الا بعلم و موافقة الطرف التاني .. انه ماينفعش يكون فيه dating .. يعني يا اما سكس و بس او صحاب بس .. يعني مثلاً ممنوع البيات .. و هكذا من شروط تضمن ان موضوع العلاقات المفتوحة دة يكون لغرضه بس .. السكس مش اكتر.

لما حد في علاقة مفتوحة يعمل سكس مع حد من برا دة مش معناه انه بقى سينجل .. زي ما قلت بيكون فيه شروط للموضوع و في نفس الوقت بتكون فيه قيود نفسية على الشخص دة و هوا بيعمل سكس .. مش مفروض ان الشخص اللي في علاقة مفتوحة يعمل passionate sex مع حد غير صاحبه .. لو حصل .. يبقى لازم يفكر و يكلم صاحبه عن اللي حصل .. اهم حاجة في العلاقات المفتوحة هيا الصراحة و الصدق

قبل ما أتكلم اكتر عن العلاقات المفتوحة، حابب أتكلم شوية عن معنى كلمة "علاقة" بشكل عام .. ايه هيا العلاقة؟ .. العلاقة هيا قرار بياخدوه اتنين انهم يبقوا شركاء .. يبقوا مع بعض .. الأفضل انهم يسكنوا مع بعض بس فيه ناس كتير مش مناسب ليهم كدة فبتكون الشراكة دي في كل حاجة تقريباً الا السكن .. العلاقة هيا ان يكون فيه حد بيهتم بيك و انت بتهتم بيه .. حد مصيره مرتبط بيك .. و اَي قرار في حياتك لازم تستشيره فيه قبل ما تاخده .. حاجة كدة زي الجواز لكن من غير عقد.

لو انت سينجل، مين هوا فارس أحلامك؟ لو انت في علاقة .. ليه اخترت شريكك بالذات؟ .. هل الشريك دة لازم يبقى تيباتك جنسياً؟ و هل اللي تيباتك النهاردة هايفضل تيباتك طول العمر؟ .. هل لازم تكون ليه شخصية معينة و لا الشكل هوا المعيار الوحيد؟ و لا الشخصية هيا المعيار الوحيد؟ .. هل تعليمه و عيلته ليها تأثير على اختيارك؟ وظيفته؟ .. فلوسه؟ .. لو بصيت على كل الحاجات دي كلها هاتلاقي ان بينهم كلهم قاسم مشترك واحد .. انها حاجات مؤقتة كلها و ممكن جداً تتغير مع الزمن .. الشكل و الجسم و الفلوس و الوظيفة و حتى الشخصية .. كله بيتغير مع الزمن .. لو انت اخدت قرارك انك ترتبط بشخص معين عشان حاجة او مجموعة حاجات من اللي مكتوبين فوق دول .. تضمن منين ان الحاجات دي هاتفضل موجودة العمر كله؟ ... الإجابة بسيطة .. مافيش ضمان و غالباً ان كل الحاجات دي بتتغير

الحاجة الوحيدة اللي مش بتتغير هيا الحب .. و دة مش كلام انشا و لا محن .. لا دة كلام جد اوي اوي .. هاديك مثل ممكن يصدمك شوية .. تخيل كدة كلب صاحبه إنسان شحات و قاعد في الشارع بيشحت و الكلب قاعد جمبه في الحر و البرد و المطر .. يوم يأكل و يوم لاء و بقالهم سنين كدة .. هل تتصور ان الكلب دة ممكن يسيب صاحبه و يمشي ورا اَي حد شكله غني يعدي من قدامهم؟ .. الكلب مايعملش كدة لان الكلب حبه و وفاؤه لصاحبه غير مشروط .. مش معتمد على وضع معين لو اتغير يبقى الحب و الوفاء يتغيروا .. دة الكلب 😂

لو انت ابتديت علاقة مع حد و بعد فترة من الزمن اتغير عليك او انت اتغيرت عليه .. هاتعملوا ايه؟ .. الطبيعي ان احنا ممكن نضايق .. نتخانق .. نختلف .. دة العادي .. لكن لو لقيت نفسك عايز تسيب و تمشي لمجرد ان الوضع اللي انت دخلت العلاقة على اساسه اتغير يبقى العلاقة دي كانت لامؤاخذة مصلحة مش علاقة و انت ضحكت بقى على نفسك و لا على صاحبك .. لو انت فعلاً بتحبه .. هاتحبه مهما كان و لو اتخانقتوا في اليوم ١٠٠ مرة عمرك ما هتفكر تقوله نسيب بعض .. دة الحب

قيس على كدة السكس .. كل علاقة في بدايتها، السكس بيبقى فيها نار .. ممكن يكمل كدة و ممكن يهدى و ممكن يقف كمان .. لو الشرارة اللي بينكم طفت .. هاتعملوا ايه؟ هاتسيبوا بعض؟ يبقى الموضوع كله كان سكس بقى و كلام الحب و الهيام دة كان كلام سراير مش اكتر .. اللي بيعرفوا يعبروا بعلاقاتهم فوق المشاكل دي هما اللي بيحبوا بعض بجد

من هنا موضوع العلاقات المفتوحة .. لو السكس بالنسبة لك شيء مهم لكن مش بالضرورة مرادف للحب .. و لو العلاقة الجنسية بينك و بين صاحبك أصبحت مش ممتعة او حتى مش موجودة .. الاستمرار في العلاقة بالشكل دة بدون متنفس هاينهيها .. لكن لو انت ماتقدرش تعمل سكس one night stand و علاقتك الجنسية مع صاحبك مش كويسة .. يبقى مشكلتك مالهاش حل .. بصراحة يعني

العلاقات المفتوحة ماتنفعش غير مع الناس اللي بتقدر تعمل one night stand .. يعني سكس خطافي .. with no strings attached و على فكرة اغلب الناس كدة بس بيستهبلوا و بيعملوا نفسهم حساسين اوي .. لو تقدر تفصل بين ال one night stand و ال love making كدة انت تقدر تكون في علاقة مفتوحة

لكن بصراحة موضوع العلاقات المفتوحة مش سهل زي ما أنا بقول كدة .. الموضوع ليه اثار جانبية .. على اد ما بيفيد على اد ما ممكن يضر ... الغيرة .. تخيل كدة صاحبك بيعمل سكس مع حد تاني .. تخيله و هما بيبوسوا و بيقلعوا و بيهيجوا على بعض .. تخيل بعد ما بيجيبوا بيناموا شوية في حضن بعض .. مش سهل الموضوع و مؤلم انا معاك .. ايه كمان الأضرار الجانبية .. فرصة الإعجاب و الارتباط بشخص تاني .. تخيل انتوا في علاقة مفتوحة و صاحبك او حتى انت قابلت واحد للسكس و حصل ما بينكم إعجاب و ابتديتوا تتكلموا و الموضوع تطور .. كمان وارد .. فيه مسافة جفاء ممكن تنشأ بينك و بين صاحبك في العلاقة المفتوحة نتيجة انك بقيت بتعمل سكس بس مع ناس تانية مش معاه .. القائمة تطول

لما تحكم على حاجة .. شوف اللي ليها و اللي عليها .. لو هاتحكم على العلاقة المفتوحة، احكم عليها بالمقارنة مع العلاقة المقفولة او ال closed relationship .. لو العلاقة المفتوحة فيها كل المخاطر اللي فوق دي .. هل لو كنّا سيبنا العلاقة closed كنّا هانبقى في وضع أفضل؟ أقولك الحق؟ مكانش هايبقى فيه علاقة من اساسه .. تخيل كدة انك عمال بتنفخ في بالونة و الهوا عمال ينفخ فيها و مش بتنفس من اَي حتة .. هايحصل ايه؟ البالونة هاتفرقع .. لكن لو عملت خرم صغير في البالونة .. مهما نفخت فيها .. مش هاتفرقع .. بس خلي بالك .. لو الخرم دة كبير اوي ممكن البالونة تفش و تموت .. من غير ما تفرقع

انا اقصد ايه بالكلام دة؟ .. انت زعلان من الأعراض الجانبية بتاعة العلاقات المفتوحة اللي هيا الغيرة و الخوف من ظهور حد جديد؟ .. طيب ما دي مخاطر موجودة كدة كدة اصلاً .. يعني هوا الحد الجديد دة مش كان ممكن يظهر في شغل او حفلة او خروجة؟ .. السرير مكان زي باقي الأماكن على فكرة .. و الخيانة مش بس سكس .. الخيانة ممكن تكون مكالمة تليفون .. رسالة .. بوسة .. و اذا كان على الغيرة .. ياما ناس علاقاتها انتهت بسبب الغيرة و اللي يجننك ان العلاقات دي كانت closed .. كانوا بيغيروا على بعض من الهوا و ماقدروش يتعايشوا مع الضغط العصبي بتاع الغيرة .. ماتلومش العلاقات المفتوحة على الأعراض دي لانها موجودة كدة كدة .. العلاقات المفتوحة بس بتزود تعرضكم للأعراض دي .. بتزود فرصة ظهور المشاكل للأسباب دي .. لكن خليك فاكر ان لولا العلاقة بقت مفتوحة يمكن مكانش هايكون فيه علاقة من الأساس .. مكانش هايكون فيه حد تغير عليه او تتخانق معاه اصلاً

كل ما حطيتوا شروط للعلاقات المفتوحة كل ما عرفتوا تحافظوا على بعضكم و على علاقتكم و افتكر مثل البالونة .. العلاقة المفتوحة مش معناها نبقى عاهرات .. رجالة داخلة خارجة ٢٤ ساعة .. و لا كمان راجل واحد يتعمل معاه كل يوم .. لا دة و لا دة .. خليك random و بلاش ترتبط بحد .. بلاش بيات عند حد .. لو حد عاجبك لكن مش بيعمل سكس غير لما ي date الاول .. ماتعملهاش .. اصرف نظر عنه لانك مش الراجل المناسب ليه .. افتكر دايماً ان انت taken و مافيش حد من حقه يخش قلبك .. اوعى كمان تحتقر اللي بتنام معاهم و تعاملهم بفوقية كأنهم شراميط .. بصراحة انت كدة اللي هاتكون شرموط .. التوازن صعب تحقيقه بس افتكر الثمن ايه ... الثمن ان انت تحافظ على حب حياتك و على اتزانك النفسي و رضاك عموماً عن نفسك و عن حياتك .. لو فتحتوا الدنيا عالبحري و كل واحد بقى من حقه يبات برا و يخرج مع اللي هوا عايزه .. كلها شهر او شهرين بالكتير و اصلا هاتنسوا بعض من غير breakup و لا بتاع .. هيا لوحدها هاتنتهي .. و لو زنقتوا على بعض فشخ .. هاتنفجروا في وش بعض .. كله بالحب يا جماعة 😂

الغيرة و الخوف و القلق حاجات سلبية .. لو علاقتكم (سواء مفتوحة او مقفولة) بقت عبارة عن الحاجات دي يبقى هاتنتهي .. الحب و الثقة و العدل حاجات إيجابية تقدر تنقذ بيها علاقتك .. العلاقة المفتوحة فرصة لمواجهة المشاعر السلبية و الانتصار عليها .. الغيرة الزيادة ممكن تدمرك نفسيا قبل ما تدمر علاقتك .. الغيرة الزيادة بتخليك تشك في كل حاجة و اَي حاجة مهما كانت صغيرة او حتى مالهاش معنى .. بتخليك تفسر الحركات البريئة بخيانة كاملة .. لو انت في علاقة مفتوحة و انت و صاحبك (عشان مابقاش فيه مساحة للسكس بينكم) و بتعملوا سكس مع ناس تانيين و بترجعوا لبعض كل يوم و بتناموا في حضن بعض .. يبقى لازم تثقوا في بعض .. يبقى انت بقى عندك جرأة و ثقة في نفسك و في صاحبك انه حتى لو عمل سكس مع حد غيرك ... قلبه لسة معاك .. خلي بالك انت كدة عديت الغيرة و الشك و الخوف و وصلت للثقة و الحب و الشعور بالأمان .. العلاقة المفتوحة ممكن تزود ثقتك في نفسك و في صاحبك و في علاقتكم انها مش عبارة عن سكس و خلاص .. و انها مستمرة و شغالة حتى من غير سكس

مش كل الناس تقدر تكون في علاقة مفتوحة لان نفسياتهم مش جاهزة .. ثقتهم في نفسهم مش كفاية او ثقتهم في الطرف التاني او العلاقة نفسها مش كفاية .. او عندهم مشاكل بخصوص الغيرة .. ماتجبرش نفسك على حاجة و ماتعملش حاجة انت مش مقتنع بيها .. بس افتكر ان مافيش حاجة اسمها علاقة سهلة و سعيدة على طول .. لازم تعمل تضحيات عشان تحافظ على علاقتك و شريكك .. لو انت فعلا بتحبه هاتلاقي انه سهل تقدم كل التضحيات عشان تسعده و تكون معاه و هوا كمان هايعمل نفس الحاجة لو هوا كمان بيحبك زي ما انت بتحبه .. لو مافيش حب .. اقل تغيير هايبقى كفيل انه ينهي العلاقة

اخيراً .. لو لسة مش مقتنع بالعلاقات المفتوحة .. دة رأيك و انت حر فيه بس اوعى تحكم على حد في علاقة مفتوحة او تهاجمه .. اللي في علاقة مفتوحة مش شرموط و لا لابس قرون .. دة واحد ماسك بإيده و سنانه في حبيبه و في علاقته مش زيك نزل في اول محطة بعد اول خلاف او مش زيك مش عارف يخش في علاقة اصلاً .. لو حكمت على غيرك .. حكمك على نفسك هايوجعك اكتر و اكتر .. انا من مجمل علاقاتي و معارفي و صحابي .. شايف ان اغلب العلاقات بين الجاي مش بتطول .. اجدع علاقة بتكون سنتين تلاتة و بس .. طيب طالما الموضوع كدة كدة مش شغال .. هاتخسروا ايه لو جربتوها؟