الشات و الأبليكيشن

فيه مثل مشهور بيقول "لسانك حصانك إن صنته صانك" .. دة باختصار جوهر و مضمون البوست دة ... اغلب تخاطبنا مع اللي حوالينا بيكون بالكلام .. فيه تخاطب بالعيون و فيه باللمس و فيه بالسكس لكن أغلب تخاطبنا... بالكلام .. إذن لو كلامنا كويس و مظبوط يبقى علاقاتنا هاتبقى كويسة و مظبوطة و العكس صحيح .. دة موضوع لا ينطبق بس على الشات و كلامنا في السكس و المواعدة بس ... دة ينطبق على كل نواحي حياتنا ... لسانك حصانك.

لو جينا نتكلم عن موضوع الشات على الابليكيشن .. أنا (و اكيد كتير من اللي بيقروا) عندهم خبرات طويلة في الموضوع دة و مواقف حلوة و مواقف تانية مزعجة .. بلوكات بقى أو حوار بدأ بكلام بعدين بقى حب العمر أو صديق العمر الخ الخ من خبرات كتير .. أنا هنا حابب ألخص الخبرات دي بشكل يخلينا نفكر قبل ما نتكلم و نتجنب حاجات ممكن تخلي شكلنا وحش قدام اللي بنكلمهم.

مبدئياً .. على الابيليكشن، الناس بتخش بتقيمك على اساس صورتك .. تقييم غير عادل طبعاً لكن هوا دة اللي انت بتحطه لنفسك كعنوان ... هوا دة اللي الابليكشن عاملاه ... حط الصورة اللي انت عايز الاخرين يشوفوك من خلالها ... يعني .. لو انت مش عايز سكس، ماتحطش صورة سكسي جداً ليك عشان الشباب الهيجان أصلاً مش هايقرى ان انت مش بتدور على سكس (دة لو انت كاتب كدة أساساً كمان) و هايخش يقولك يالا نط على بعض ههههه ... حط صورة ليك و انت لابس هدومك تكون حلوة كدة ... لو مش بتدور على سكس، مش ضروري تحط صورة وانت لابس نقاب يعني ... حط صورتك وانت لابس تيشرت كت و شورت لطيف .. يعتبر لبس أهو بس يبين انك شخص سكسي كمان ... افتكر دايماً ان الناس على الابليكيشن ماتعرفش عنك اي حاجة غير صورتك لحد ما يبدأوا يتكلموا معاك ... لو بتدور على سكس يبقى اقلع بقى و ابرز المفاتن و الجاي كلهم شاطرين في الموضوع دة ... مش محتاجين علام.

لو انت عايش في مكان ممكن فيه يتعرف عنك انك جاي من غير ما تحصلك مشاكل، حط صورة فيا وشك ظاهر .. لو فيه مشكلة في كدة .. بلاش .. أمنك و سلامتك أولاً ... طبعاً مش محتاج أقول بلاش نحط صور مش بتاعتنا .. و بلاش نحط صور قديمة بقالها كام سنة .. خليك أمين و افتكر انك ممكن تقابل شخص من على الابليكيشن لان جزء من اعجابه بيك كان مظهرك اللي شافه في الصورة و لو شاف انك غير اللي في الصورة هايبقى شكلك محرج نيك ... نقطة كمان ... صورة نص وشك مش صورة وشك .. صورة ايدك مثلاً مش صورة شخصية تؤهلك تطلب من الناس يبعتولك صورهم عشان انت حاطط صورة! ... صورتك و انت لابس نضارة شمس مغطية 200% من وشك مش صورة لوشك ... بلاش استهبال.

حاول تحط اسم بروفايل يعبر عن شخصيتك الحقيقية .. مش ضروري اسمك لو خطر .. بس أنا لاحظت إن أغلب الجاي في مصر مثلاً اسمهم ميدو أو مادو أو مومو .. ايه يا جماعة التخلف دة ... اللي هوا اقنعوني شوية ... الاسم المستعار مش عيب في الأماكن الخطرة .. ليك حق ماتثقش في حد لحد ما ترتاحله ... بس على الاقل خلي فيه نوع من الـ individuality في اسم البروفايل.

حاول تكتب معلومات اساسية عن نفسك في البروفايل عشان توفر الاسئلة الكتير اللي مالهاش لازمة "سنك نوعك مواصفاتك رولك" و الكلام دة كله .. لو فيه خلايجة بيقروا هنا .. بلاش دخلة "سنك نوعك مواصفاتك رولك" دي عشان بتكون سخيفة فشخ و محدش غيركم بيعملها ... بتعملوها حتى لو المعلومات دي موجودة عالبروفايل أصلاً ... بطلوها لو سمحتم و اتكلموا عادي ... حط سنك الحقيقي .. حط رولك توب و لا بوتوم و لا غيره ... حط انت بتحب ايه بالظبط أو مش بتحب ايه بالظبط .. يعني فيه ناس مثلاً مش بتحب الرفيعين .. حقهم .. اكتب معلش يا جماعة أنا مش بحب الرفيعين .. عشان ماتغلبش بقى في اعتذارات و بتاع .. صحيح فيه ناس كتير مش بتقرا و بتخش بتتكلم عادي بس ساعتها ممكن تقوله معلش بس اقرا بروفايلي و خلاص ... من حقك تحب أو ماتحبش اللي على مزاجك .. دي حريتك الشخصية مش حريات عامة ... اكتب باختصار تيباتك ايه أو اللي مش بتحبه ايه.

ماتكتبش كلام كتير أوي في بروفايلك ... شفت ناس كاتبة قصة حياتها في بروفايلها و متوقعة ناس ماتعرفهمش يقروا الكلام دة كله! محدش هايقرا كلامك الكتير .. اكتب ما قل و دل.

اغلب الابليكيشن بتخليك تكتب اذا كنت HIV + او - و تاريخ الاختبار .. خلي التواريخ دي و المعلومات دي up to date دايماً عشان من حق اللي هايقابلك يكون على نور من الاول.

خلصت بروفايلك؟ .. تمام ... ازاي تكلم الناس؟ ... لو عندك ملكة معينة في فتح المواضيع و بتشتغل معاك؛ نايس استخدمها .. أنا هنا هاتكلم عن الشات العادي .. لو حد عجبك .. ابدأ بـ هاي أو هالو أو سلام .. أي حاجة .. بلاش خالص تبدأ بطلب يعني تقوله "صورك" حتى لو انت حاطط صورك .. ماينفعش تخش نؤمر و تتأمر على الناس .. ممكن تلاقي ناس desperate ترد عليك بس لو وقعت في حد واثق في نفسه ممكن يديك بلوك من غير حتى ما يرد عليك ... بس لو حد كلمك و مش حاطط أي صورة، من حقك ما تبدأش شات معاه غبر لما يبعتلك صورة ليه الأول .. لأنه أصلاً دخل عندك عشان صورتك عجبته فمن حقك انت كمان تشوفه عشان تقرر.. بلاش مقدمات طويلة .. يعني مثلاً هاي كفاية أوي ... عمري ما فهمت فايدة سؤال "عامل ايه؟" دة من حد ماعرفوش أو لسم هاتعرف عليه ... يعني مثلاً لو انا حزين و مضايق فشخ، ايه اللي يخليني أقول لحد لسة معرفوش المعلومات دي؟ ... قدم نفسك باختصار ... اسمي فلان ... عندي كم سنة .. ساكن في المنطقة الفلانية .. و انت؟ و الحوار هايكمل لوحده.

لو انت عايش في بلد عادي تكون فيها جاي، خلي صورك (اللي مش عريانة) دايماً ظاهر فيها وشك .. اوعى تتصورعريان ملط و و وشك باين و تبعتها لأي حد حتى لو عايش في امستردام ... نصيحة مني ... خلي صور الوش دي و انت لابس و خلي صور الجسم من غير وش .. انت ماتعرفش انت بتكلم مين و انا ياما سمعت عن قصص ابتزاز مقرفة و مرعبة .. لو انت في بلد خطر تكون فيها جاي، خليك حريص و انت بتبعت صورك .. يعني ماتوزعهاش على الكل كدة و ماتحطش صورة وشك بروفايل ... بس كمان ماتخونش أوي بحيث ان انت ماتبعتش صورك لحد خالص .. خليك حريص بس.

ماتسألش أسئلة شخصية أوي من أول شات .. يعني مثلاً لو حد بيرد متأخر و قالك معلش أصلي برا ماتسألوش "فين؟" أو "بتعمل إيه" ... هوا لسة مش خطيبك عشان تسأل الأسئلة دي .. ماتبقاش لحوح و ماتضغطش على اللي بتكلمه .. يعني لو انت هيجان و عايز دلوقتي و اللي عاجبك مش فاضي ماتقعدش تلح بقى و تقوله طيب ماتسيب اللي في ايدك و تعالى .. طيب ما تأجله لبكرة دة و تعالى .. بلاش رخامة .. نصيحة تاني ... خليك واضح في اللي انت عايزه لأني شفت ناس داخلة تتكلم و هما مش عارفين هما عايزين ايه أصلاً و الكلام كتير و لا انت فاهم دة عايز سكس و لا علاقة و لا صداقة و لا ايه ... وقت الناس و مشاعرها مش لعبة عشان تخش تتسلى بيهم و تملى وقت فراغ جنابك ... لو عايز سكس، خلي الكلام في الاتجاه دة .. لو عايز صداقة من غير سكس كمان خليك واضح .. انا كتبت قبل كدة انه غلط (من وجهة نظري) انك تكتب انك عايز علاقة عشان الناس ممكن تقفش شوية أو تكون uneasy و هما بيكلموك .. مش معنى انك بتدور على سكس بس انك تكون سخيف أو تتعامل مع الناس على انهم أشكال أو أجسام بس .. خليك لطيف عشان اللطف دة هايجذب الناس ليك اكتر ... قلة الذوق مش سكسي على فكرة.

لو الكلام وجهاً لوجه، الموضوع مش مختلف أوي عن الشات .. خلينا نفترض إنك في حفلة أو تجمع جاي .. حاول تكون طبيعي و ماتغيرش شخصيتك ... طبعاً ممكن تلبس لبس يناسب المكان اللي انت رايحه .. بس ماتغيرش شخصيتك و تاخد دور مش دورك لأي سبب .. نقطة كمان في الحفلات و التجمعات ... بلاش expectations ... يعني بلاش تخش حفلة عشان تعلق حد .. فكر انك خارج خروجة زي اي خروجة و هاترجع وي ما رحت بس .. هاتبقى مرتاح و واثق من نفسك ... كمان بلاش عنيك تزوغ و تراقب كل اللي حواليك و تفرزهم تيبات و مش تيبات .. لو شفت نفسك و انت عمال تبص على الناس بالشكل دة هاتفهم أنا باقولك ماتعملش كدة ليه ... الناس اللي عنيها زايغة على طول كدة بيبقوا شبه اللي عندهم اضطراب نفسي و عمالين يبصوا حواليهم ... صدقني شكلها وحش جداً ... خليك طبيعي جداً كأنك في مكان عادي.

لو حد جه كلمك .. ماتعملش فيها باريس هيلتون ... خليك بشوش و متواضع بس في نفس الوقت مش مدلوق و أهبل .. خليك متوازن ... لو حد قالك "مساء الخير" قوله "مساء النور" بس .. مش "مشاء لنور ازيك أنا فلان و سينجل و حلي هنا أدور على شريك العمر ... بلا بلا بلا" ... فيه موقف حصلي زمان عايز أحكيلكم عليه كل ما افتكره افطس على روحي من الضحك .. كنت لسة معنديش خبرة و كنت معزوم على حفلة عيد ميلاد و كلها جاي .. المهم انا طبعي شكلي رجولي جداً و أول ما دخلت، فيه واحد بصلي و شكله أعجب بيا و جالي و قالي تحب تشرب ايه .. قولتله wine و راح الشاب جابلي كاس و جاب لنفسه كاس و ابتدى يتكلم عادي و قال نكتة تقريباً أو تعليق مضحك قمن ضحكت حتة ضحكة و لا نبيلة عبيد .. طبعاً الواد اتفضح و هرب و لا شفته تاني طبعاً من ساعتها :))) .. خليك طبيعي و على راحتك .. مش معنى انك رايح حفلة جاي يبقى تتحول لشخص مش انت عشان تجذب الانتباه ... بس فيه نقطة عايز أوضحها .. لو انت بطبعك بنوتي أو مايص (دة طبعك الحقيقي مش تمثيل يعني) ماتغيرش نفسك بردو .. سيبك من الناس المتخلفة اللي بيقولك انت كدة بتسيئ للجاي و الكلام الغبي دة ... خليك على طبيعتك مهما كانت لآن هوا دة اللي بيميزنا كمثليين .. إننا على طبيعتنا و متصالحين مع نفسنا و طز في رأي الناس .. طول ما انت مش بتمثل، طز في رأي أي حد يا بيبي.

انصحك تعرف نظام و جو المكان قبل ما تروح عشان في أماكن و حفلات كتير ممكن تندم ان انت رحتها ... لو صعب تعرف الجو ايه قبل ما تروح، روح بس خليك مستخبي كدة و راقب الجو عامل ايه ... لو مناسب ليك دوس و اندمج و خش ... لو مش جوك، امشي و اوعى عقلك يقنعك انك تقعد.

فيه أماكن الناس فيها بيكون عندهم attitude ابن كلب ... ماتبقاش متواضع و بشوش مع الناس دي ... بس طبعاً ماتهاجمش حد ... روح هناك مع صحابك مش لوحدك و لو حد كلمك خليك كول و لطيف بس مانصحكش تكلم حد انت عشان attitude الهوانم هايطلع و هاتزعل من نفسك.

بخصوص اللبس .. لازم تعرف اذا فيه theme معين للمكان او المناسبة اللي انت رايحها .. فيه مثلاً حفلات بتكون black يعني لازم تكون لابس اسود ... لازم تتصرف و تعرف قبل ما تروح ... البس حلو عشان انت تستاهل تظهر بمظهر حلو مش عشان تكون احلى من فلان أو سكسي اكتر من علان .. البس حاجة تكون مرتاح فيها و كمان تكون stylish و شيك .. عادي ممكن تنزل تشتري هدوم مخصوص عشان مناسبة أو حفلة ... مظهرك شيئ مهم جداً ... مش بس للحفلات و الكلام دة .. حتى لشغلك ... دايماً البس كويس .. بلاش الاوفر لو سمحتم ... الأوفر دة بيكون بالمقارنة مع طبيعة المكان / البلد ... يعني لو عايش في اوروبا، مافيش حاجة اسمها اوفر ... البس اللي انت عايزه بجد .. لو في بلد مافهوش اعتراف بالمثليين، خلي الموضوع تحت السيطرة.

افتكر دايماً ان قبل ما الناس تعجب بجسمك، بتعجب بكلامك و مظهرك ... خلي بالك من كلامك و صوتك و لبسك .. هوا دة اللي الناس بتشوفه قبل ما يعرفوك شخصياً على الحقيقة .. طبعاً مش باقول اننا لازم نقيم الانسان على اساس مظهره .. بس لحد ما تعرف الشخص على حقيقته شخصياً، المظهر هوا كل اللي انت شايفه .. فيستحسن يكون كويس :))

هاف فن جايز :)