Making Love

انت ممكن تعمل سكس مع حد ماتعرفوش .. مع حد حتى ماتعرفش اسمه .. حد ممكن تكون شوفته في الشارع و عيونكم قالت كل الكلام قبل ما تتعرفوا على بعض .. أو حتى حد جبته من على الابليكيشن و مالحقتوش تتعرفوا على بعض قبل ما أجسامكم هيا اللي تتعرف .. و ممكن تعمل سكس مع حد قابلته قبل كدة و اتعرفت عليه .. ممكن تكونوا اتكلمتوا و سهرتوا ... شربتوا كاسين ... مسكتوا ايدين بعض بالصدفة او قصد ... مشيتوا في شارع طويل و قعدتوا تتكلموا طول الليل لحد ما الفجر طلع ... لو عملتوا سكس بعد الحوارات دي ... ممكن يكون مش مجرد سكس ... ممكن يكون making love أو سكس رومانسي.

السكس الرومانسي بيكون أعمق بكتير جداً من السكس العادي لأن العمل العقلي و الوجداني فيه بيكون أكتر من العمل الجسدي ... المشاعر هيا اللي بتوجه السكس مش الجسد ... الجسد بيكون مجرد وسيلة مش هدف .. الهدف بيكون اظهار المشاعر ... مش اي حد تقدر تقوله "بحبك" او "انا معجب بيك" لكن تقدر تبينله المشاعر دي من خلال السكس الرومانسي ...

ايه هوا السكس الرومانسي دة؟ هو عبارة عن ثورة مشاعر و أحاسيس العقل معرفش يحتملها أو يسيطر عليها .. بيخرج الزائد منها على هيئة سكس ... بمعنى تاني إن الجسد بيساعد النفس على استيعاب المشاعر دي و اخراج الزائد منها أو الغير محتمل منها على هيئة سكس ... خد مثلاً موضوع "الكراش" ... الـ crush دة من اسمه حد انت مابتقدرش تكون متماسك قدامه .. بيغلبك بحلاوته كشخص و كجسم و ككل حاجة ... بتبقى قدامه مش عارف تعجب بإيه و لا إيه ... لسة مش حب بس إعجاب خارج حدود السيطرة ... مش بتقدر تبطل تفكير فيه طول الوقت .. نهار و ليل .. حتى في أحلامك ... لما عقلك بيقولك انه مش قادر يحتمل كم التفكير دة كله في الكراش، بيقترح عليك انك تعمل سكس معاه عشان تهدى شوية من ناحيته و تكون المشاعر على درجة محتملة.

السكس الرومانسي كـ process مايختلفش عن السكس العادي اللي هوا سوفت و بعدين هارد و بعدين قمة النشوى ... بس فيه شوية فروق ... السكس الرومانسي لازم بيكون فيه بوس .. حتى اللي مش بيجب البوس عموماً ... لما بيعمل سكس رومانسي لازم بيبوس ... السوفت عموماً بيبقى نار .. الاتنين بينتهزوا فرصة السكس عشان يظهروا لبعض اللي مكسوفين أو مش قادرين يقولوه لبعض ... الهارد مش بيكون شهوة قد ما بيكون هوا الـ discharge الفعلي للمشاعر الزيادة عشان كدة أحياناً بيكون فيه شوية عنف أو شغف زيادة ... لو عملت سكس مع الكراش بتاعك .. غالباً هاتقدر بعدها تتحكم في مشاعرك و تقدر تشوف انت فعلاً عايز ايه منه ... هل تنفع علاقة حب و لا هوا مناسب و لاغير مناسب ... الخ

من ناحية تانية بقى - السكس الرومانسي ممكن يكون خطر جداً لان أحياناً مشاعرك بتزيد تجاه الشخص بعد ما تعمل معاه سكس بالشكل دة .. يعني بدل ما تهدى من ناحيته، اعجابك و شغفك بيه يزيد .. و دة ممكن يحصل لو كنت معجب بالشخص دة لكذا سبب (غير انه سكسي) و بعدين اكتشفت في السكس انه كمان جامد جنسياً فإعجابك بيه بيزيد .. دة غير الكراش اللي انت مجرد معجب بيه لأسباب انت مش عارفها .. مجرد إعجاب شديد غير مفهوم .. عادة بتهدى من ناحية الشخص دة لو عملت معاه سكس ...

مشكلة تانية في السكس الرومانسي انك تكون مثلاً حاسس ان المشاعر من طرفك انت بس بعدين لما تعملوا سكس تلاقي انه كمان في نفس سخونتك و يمكن اكتر .. المشكلة في ايه بقى .. المشكلة ان فيه ناس دة الطبيعي بتاعها في السكس .. بيحبوا يعملوا سكس بدماغ .. فأنت بقى بتكون واقع لشوشتك فتتلخبط و تفتكر انه هوا كمان واقع فيك رغم انه هوا عادي جداً و مش بيعمل معاك اَي حاجة مميزة.

عشان كدة، دايماً حط الأمور في مكانها الصحيح .. رغم ان ممكن الواحد يتخاطب مع الآخرين من خلال السكس و يحاول يوصل من خلال السكس مشاعر الحب، الا ان ممكن الإشارات دي تبقى خداعة .. السكس مهما كان هوا سكس .. فيه مثل يقولك "كلام الليل مدهون بزبدة" و المثل دة يقصد الكلام او التخاطب عموماً اثناء السكس او اللي عشان يوصل للسكس .. اللي هوا الكلام العاطفي اللي بيتقال باندفاع و من غير تفكير .. النظرات العميقة .. البوس اللي بشغف ... صحيح ممكن يكون أحياناً مقصود .. اللي انا باقوله، ماتعلقش نفسك في حبال الهوا الدايبة .. خليك تقيل و لو لاحظت ان حد سخن معاك اوي في السكس و بقى الموضوع love making مش مجرد سكس، امشي معاه و انبسط و بعد السكس أتكلم معاه (من غير استجواب ههه) و افهم بالظبط دماغه فيها ايه .. لو الرسالة مقصودة يبقى فعلاً عرف يوصلهالك من خلال السكس و لو هوا بس السكس بتاعه دايماً رومانسي أديك عرفت و ماضحكتش على نفسك ببوسة و حضن.

فيه ناس بقى بتخاف من السكس الرومانسي دة و تلاقيهم اول ما حد يقرب منهم بشكل رومانسي، يخافوا و يقفشوا و ممكن يبعدوا و يوقفوا حتى السكس .. الناس دي غالباً مروا بتجارب شخصية محبطة و اتجرحوا منها و بقوا خايفين من اَي حاجة تكون شبه التجربة المحبطة دي .. تخيل مثلاً شخص عمل سكس رومانسي مع حد و قعد يرسم في دماغه أحلام انهم بقوا سوا و كدة و بعدين فجأة الشخص التاني دة يختفي و مايعرفش يوصله .. اكيد الشخص دة بيضايق و بينجرح و بيكون حساس (على الأقل لفترة من الزمن) من اَي حاجة فيها رومانسية.

فيه ناس رومانسية و حالمة عموماً في حياتها .. بشكل شوية مبالغ فيه .. يعني مثلاً لو اهتميت بيه شوية ممكن يحس انك مش قادر تعيش من غيره .. عامل مثلاً زي شخصية Janice في friends .. انا بتكلم عن الامثلة دي من الناس عشان تخلي بالك من حركاتك و انت بتعمل سكس .. السكس الرومانسي حلو و جميل بس اللعب بالقلوب لا حلو و لا جميل .. ماتلعبش على نقط ضعف الناس لمتعتك الشخصية ... خليك أمين و ماتعملش او تقول حاجة انت مش قاصدها بجد لمجرد انه يتقال عليك جامد و فشيخ في السكس ..

كمان بلاش افورة .. لو معجب بحد و اتفقتوا تعملوا سكس .. حاول تكون رومانسي بس ماتبقاش مدلوق .. بلاش مبالغة لا في الكلام و لا في الحركات .. فكر كلامك و حركاتك هايفهمها ازاي الطرف التاني و شوف اذا هيا دي الرسالة اللي انت عايز توصلهاله ... كمان بلاش تكتفي بالسكس كوسيلة تخاطب .. اكيد السكس أسلوب رائع للتعبير عن الحب لكن زي ما قلت .. ممكن يكون خداع .. أتكلم مع الطرف التاني .. خليك شجاع و صريح و أتكلم عن مشاعرك ... و افتكر دايماً انه الصراحة أفضل من انك تقنع نفسك بإعجاب او حب مش موجودين اصلاً.

بصرف النظر بقى عن كل الأمثلة و الحالات دي .. حاول تفتكر المرات اللي عملت فيها سكس في حياتك .. هاتلاقي نفسك بس فاكر السكس الرومانسي و نسيت خالص السكس العادي او ال one night stands حتى لو عملته من فترة قريبة .. لان السكس الرومانسي هوا اللي بيسيب اثر جوا نفسك و عقلك و بيكون ذاكرة حلوة عقلك بيحوشها كأنها جوهرة او حاجة غالية .. بتبتسم لما تفتكر تفاصيلها مهما مر وقت طويل .. عمرك ما هاتنسى السكس الرومانسي ... حتى لو مع شخص كنتوا في علاقة بعدين انفصلتوا .. ممكن تكره الشخص بس عمرك ما هاتكره المرات اللي عملتوا فيها سكس رومانسي (حتى لو أقنعت نفسك انك كرهتها).

السكس احلى حاجة في الدنيا .. و السكس الرومانسي هوا احلى حاجة في السكس .. ❤️❤️